Estado, avances e problemáticas na implementación de xemelgos dixitais. O proxecto de xemelgos dixitais da Xunta de Galicia. | Gaiástech

A Axencia para a Modernización Tecnolóxica de Galicia (Amtega) celebrará o vindeiro 8 de setembro, de 09:30 a 14:00 horas, unha Xornada de Expertos sobre tecnoloxías de información xeoespacial para o desenvolvemento de xemelgos dixitais. Esta xornada forma parte das actividades do proxecto «Aceleración de ecosistemas de emprendemento e innovación baseados en Xemelgos Dixitais», encadrado no Programa de Redes Territoriales de Especialización Tecnológica (Retech).

Este encontro, que se desenvolverá en formato híbrido dende o espazo GaiásTech na Cidade da Cultura, abordará cun enfoque eminentemente práctico as posibilidades dos xemelgos dixitais na xestión do territorio. O foro servirá como espazo de análise sobre a aplicación de casos reais, a avaliación da madurez tecnolóxica dos proxectos actuais e a resolución de desafíos técnicos clave como a integración de datos e a interoperabilidade, trazando de xeito estratéxico a transición dos proxectos piloto de carácter rexional cara a infraestruturas públicas consolidadas.