CIBER.gal
A Xunta de Galicia ven traballando dende fai anos na aplicación destas medidas e políticas, e unha delas foi apostar pola creación dunha estrutura de cooperación no ámbito da ciberseguridade, co fin de conectar axentes públicos e privados neste eido e poder facer fronte á crecente ameaza que supoñen os ataques cibernéticos, ademais de aproveitar as oportunidades que presenta o mercado dixital.
A constitución desta estrutura de cooperación fixo xurdir CIBER.gal, o nodo galego de ciberseguridade.
CIBER.gal, o nodo galego de ciberseguridade
CIBER.gal foi constituído no mes de xullo do 2020 pola Axencia de Modernización Tecnolóxica de Galicia (Amtega), o Instituto Nacional de Ciberseguridade (INCIBE), o Centro Criptolóxico Nacional (CCN), as catro Deputacións Provinciais e a Federación Galega de Municipios e Provincias (FEGAMP).
As entidades fundadoras son o núcleo principal do nodo, pero o obxectivo é continuar adherindo axentes, tanto públicos como privados, para converter a CIBER.gal nun aglutinador de iniciativas de ciberseguridade en Galicia.
Actualmente, están en proceso de adhesión mais de 20 empresas do sector tecnolóxico, de cumprimento e investigación, entre outros.
Solicitar a colaboración e adhesión ao nodo é moi sinxelo, basta con premer na seguinte ligazón e cumprimentar o formulario: https://amtega.xunta.gal/es/quiero-colaborar
Obxectivos
O obxectivo común do nodo de ciberseguridade galego é favorecer unha contorna dixital segura e afrontar, de forma colaborativa, os retos aos que se enfrontan empresas e administración para protexer os seus activos no ciberespazo.
Dentro do obxectivo común do nodo, desagréganse os seguintes obxectivos estratéxicos.
Servizos
Co fin de materializar os obxectivos estratéxicos e operativos, o nodo pon a disposición de empresas, cidadáns e administracións públicas de Galicia unha oferta harmonizada de servizos para cumprir as expectativas de todos os actores implicados no mesmo.
Relacións institucionais (networking)
Xestión das relacións a nivel rexional, nacional e internacional con entidades públicas e privadas con intereses comúns en relación ao nodo.
Observatorio e Coñecemento
Seguimento, análise e avaliación do sector da ciberseguridade en Galicia e outros territorios de referencia e xeración de información e coñecemento de interese para o sector.
Espazos para a investigación e transferencia de coñecemento
Posta a disposición de espazos para a investigación e transferencia de coñecemento entre os membros do nodo e outras entidades.
Asesoramento experto e provisión de servizos
Asistencia técnica e prestación de servizos de detección, prevención e xestión da ciberseguridade en administracións, empresas e outras entidades de interese en Galicia.
Concienciación e capacitación
Formación para a adquisición do coñecemento necesario e concienciación para o adecuado uso e xestión da ciberseguridade por parte dos cidadáns, empresas e administracións públicas.
Comunicación e difusión
Xeración de iniciativas e elaboración de contidos formativos e informativos e a súa difusión por canles de comunicación tradicionais e online.
Áreas de traballo
O ámbito de actuación do nodo inclúe a prestación de servizos de ciberseguridade a distintos axentes no ámbito de Galicia (cidadanía, sector público autonómico, concellos, pemes, ...) así como o fomento do talento e a coordinación da I+D+i en ciberseguridade que se realice en Galicia.
Ciberseguridade para a Sociedade
É importante que as persoas se comprometan coa seguridade. Os usuarios están cada vez mais preocupados pola seguridade, pero aínda é preciso mellorar a concienciación e a formación básica para evitar a exposición aos riscos derivados do uso do ciberespazo e saber actuar ante os ataques cada vez mais frecuentes e de maior impacto.
Ciberseguridade para a Empresa
O tecido empresarial require mellorar as súas capacidades dixitais para acceder a un mercado mais amplo, incrementar a súa competitividade e as súas capacidades no campo da ciberseguridade para protexer os seus activos e garantir a seguridade dos seus clientes e dos servizos que ofrecen.
Ciberseguridade para a Administración Pública
As administracións galegas teñen entre as súas prioridades garantir a seguridade nas súas actividades e infraestruturas para o cal precisan desenvolver actividades para a formación dos empregados públicos e investimento para a mellora e actualización constante dos seus sistemas que permita prestar os seus servizos de maneira segura para a cidadanía.
Fomento do talento
A falta de persoal cualificado neste sector é un problema a nivel internacional, e por tanto tamén a nivel rexional, motivo polo que nos últimos anos dende Galicia se está facendo un esforzo importante en mellorar a formación e concienciación de empresas e sociedade no ámbito da seguridade. CIBER.gal apoia a potenciación do talento a través de iniciativas e programas de participación cos axentes do sector.
Fomento da innovación
A innovación desempeña un papel fundamental no desenvolvemento das rexións e por tanto da economía, sendo un factor relevante para manter a competitividade no mercado mundial. En Galicia, a innovación tecnolóxica e en concreto no ámbito da ciberseguridade, é crítica para reforzar as capacidades do seu hipersector TIC.