Sorry, you need to enable JavaScript to visit this website.

Alumnado do centro Escolapios de Monforte explica no Telexornal da TVG a súa experiencia no concurso Ciberseguridade No Cole! | Gaiástech

Alumnado do centro Escolapios de Monforte explica no Telexornal da TVG a súa experiencia no concurso Ciberseguridade No Cole!

concurso ciber
  • O Telexornal da TVG entrevista a dous dos alumnos gañadores da  II Edición do concurso Ciberseguridade No Cole.
  • "Facían preguntas sobre casos que poden pasar na nosa idade, como os conceptos sexting e grooming" relata un dos alumnos gañadores desta II Edición do concurso.
  • O obxectivo do concurso é que os nenos/as aprendan, dunha maneira lúdica, os coñecementos necesarios para facer fronte aos perigos do uso de medios dixitais. 

Pódese consultar aquí, no minuto 39:31 do Telexornal Serán do pasado 22 de novembro ás 20:30h, o testemuño de dous dos rapaces da clase de segundo da ESO do centro Escolapios de Monforte de Lemos.

Os alumnos de segundo da ESO do colexio Escolapios de Monforte de Lemos gañaron, por segundo ano consecutivo, na categoría de secundaria, a segunda Edición do Concurso Ciberseguridade No Cole, organizado por Telefónica no marco do II Encontro CIBER.gal.

 "Moitas cousas aprendín, eu non era consciente dos riscos que ten unha conta de Instagram ou mesmo os sticker do WhatsApp" relata un dos alumnos entrevistados neste telexornal. 

Sexting, grooming, phishing ou bullying son algúns conceptos do ámbito da ciberseguridade descoñecidos por moitos pero que os alumnos de segundo da ESO do colexio Escolapios de Monforte respostaron correctamente no concurso. 

Aínda que a ciberseguridade abrangue moitos campos, a ética social é cada vez máis importante, sobre todo nestas idades.

O acoso a través das redes sociais é algo cada vez máis habitual entre os adolescentes polo que, como ven expón outro dos nenos entrevistados "casos sobre todo da nosa idade, con cousas que poderían pasarnos" son algúns dos temas  protagonistas neste concurso de ciberseguridade.

No citado concurso, participaron máis de 150 equipos de distintos centros educativos de Galicia. Foron máis de 4.000 alumnas e alumnos galegos os que se sumaron a esta iniciativa para aprender de xeito ameno e divertido cuestións clave na seguridade dixital.

O certame baseouse en ver qué equipo era máis áxil á hora de respostar cuestións relativas sobre os perigos do eido dixital e o bo emprego da tecnoloxía.  

O obxectivo deste concurso é que, dunha maneira lúdica,  os alumnos adquiran os coñecementos necesarios para facer fronte aos perigos que supón o uso dos medios dixitais, ademáis de axudar a crear unha cultura de ciberseguridade dende idades temperás.