CITEEC | Gaiástech

Consiste no desenvolvemento de software de modelización hidráulica 2-D para a simulación computacional do fluxo en superficie libre en ríos e estuarios. A modelización resolve os procesos hidrodinámicos, de turbulencia, de transporte de sedimentos e de calidade da auga e do hábitat. Algunhas das múltiples aplicacións son o fluxo de augas superficiais, a avaliación do risco de inundación, a simulación de correntes de marea, o transporte de sedimentos, a dispersión de contaminantes, etc.

Consiste na aplicación de sistemas de monitorización, control en remoto e automatización das infraestruturas utilizadas para a xestión integral do ciclo da auga urbana, incluíndo os sistemas de abastecemento de auga potable, de drenaxe e recollida de augas residuais, e de saneamento das mesmas. Aplícanse, entre outras, tecnoloxías relacionadas coa Internet of Things (IoT) e coa Intelixencia Artificial (IA).

O sistema fundaméntase na monitorización in situ dos 6 tipos de movemento dos buques atracados nunha determinada instalación portuaria. A información recollida combínase con datos climáticos para o desenvolvemento, mediante a calibración de funcións de transferencia e a aplicación de técnicas de intelixencia artificial, de ferramentas de predición da axitación dos buques e de axuda á toma de decisións na xestión das operacións portuarias, maximizando a súa eficiencia.

Consiste no desenvolvemento de software propio e adaptable para a resolución numérica de problemas de mecánica do sólido mediante métodos matriciais en estruturas discretas, e mediante Métodos de Elementos Finitos e de Análise Isoxeométrico en estruturas continuas. Tamén se desenvolve software propio para a resolución numérica de problemas de optimización con restricións de tipo xeral. Algunhas aplicacións destacables son por exemplo a optimización de jackets para parques de eólica off-shore.

Desenvolvemento de software propio e adaptable para a resolución numérica de problemas de mecánica de fluídos (CFD) mediante os Métodos de Volumes Finitos e de Elementos Finitos. Entre as aplicación encóntrase a simulación de fluxos en réxime turbulento, a detección de ondas de choque en fluxo compresible, a análise de cavitación en perfís aerodinámicos e hidrodinámicos, o deseño de turbomáquinas, etc. Tamén se desenvolven métodos sen malla para problemas complexos de superficie libre.

A resolución mediante modelos de simulación computacional de problemas acoplados de mecánica de fluídos permite resolver simultaneamente o fluxo hidrodinámico e a propagación no medio mariño da salinidade, do calor, de contaminantes, de sólidos en suspensión e de especies biolóxicas. Con este sistema é posible modelar grandes zonas costeiras, o que permite realizar o seguimento, por exemplo, da propagación de vertidos. Este tipo de modelización tense aplicado xa na práctica á Ría de Arousa.

Desenvolvemento de paquetes de software para o deseño asistido por ordenador, o cálculo e a optimización de torres de alta tensión, así como para o cálculo de redes de terra de subestacións eléctricas, incluíndo a resistencia equivalente do sistema de posta a terra, a distribución de potenciais durante unha descarga e o potencial transferido a grandes distancias a través de cables enterrados. Outros campos de análise son a extracción de hidrocarburos e a explotación de enerxía xeotérmica.

Desenvolvemento de software que permite calcular o comportamento estrutural dos firmes, simular a degradación da superficie de rodadura, e cuantificar a redución da vida útil da sección debido ao aumento das cargas dinámicas exercidas sucesivamente polos vehículos (a diferenza das normas actuais que non teñen en conta os efectos dinámicos do deterioro do perfil lonxitudinal de rugosidade). Tamén permite analizar a vida útil do firme en función do mantemento e as operacións de conservación.

A enxeñaría biomédica consiste na aplicación dos métodos da enxeñaría computacional á resolución de problemas relacionados co tratamento e curación de enfermidades, desenvolvendo modelos específicos para cada paciente segundo as características da persoa e a súa enfermidade, co fin de deseñar o mellor tratamento posible. Disponse de modelos de enxeñaría cardiovascular (localización de bypass, evolución de aneurismas, etc.) e de simulación de anxioxénese (predición do crecemento de tumores).

Consiste na utilización de técnicas de intelixencia artificial (redes neuronais e programación xenética, principalmente) para extraer novo coñecemento a partir das bases de datos de ensaios coas que se conta no ámbito da construción, sendo posible predicir o comportamento de materiais e estruturas. Algunhas das aplicación efectuadas analizan a adherencia entre formigón e aceiro, o cortante en vigas de formigón, a resistencia do formigón en función da súa composición, ou a durabilidade de presas.

Especialización na implementación de técnicas de instrumentación e medida moi específicas nos campos da construción e a edificación, chegando a desenvolver sistemas propios patentados. Pódense destacar os sistemas baseados en técnicas de correlación dixital de imaxes, os empregados en ensaios de formigóns expansivos de larga duración, ou o reómetro deseñado e construído para determinar os parámetros reolóxicos do formigón.

Desenvolvemento e aplicación de métodos numéricos para o análise da resposta de estruturas sometidas á acción do vento, con especialización na optimización de pontes de gran van e de fuselaxe de aeronaves. Estes modelos facilitan a visualización da resposta aeroelástica e aerodinámica, identificando e interpretando os fenómenos que suceden arredor das xeometrías analizadas. A modelización numérica apoiase con ensaios experimentais nos túneles de vento dispoñibles (aeroelástico e de capa límite).

Desenvolvemento e aplicación de métodos numérico-computacionais para o estudo e a optimización estrutural do deseño de diversas partes da fuselaxe de aeronaves, principalmente para protección contra impactos, mellorando a absorción de enerxía e limitando os picos de aceleración que poderían danar aos ocupantes. A modelización numérica complementase con ensaios experimentais na torre de impacto dispoñible. Tamén se abordan problemas prácticos de estruturas aeroespaciais en contornas de incerteza.

Deseño de técnicas e sistemas de xestión, operación e control do tráfico en tempo real, con estratexias dirixidas tanto á optimización da capacidade como ao control de accesos. Así mesmo, abórdase o deseño de estratexias de xestión do tráfico baseadas na cooperación entre vehículos intelixentes/autónomos, a infraestrutura e outras fontes de datos (p. ex. teléfonos móbiles), especialmente mediante condución cooperativa V2X en forma de platooning.

Consiste na toma de datos captados por sistemas de monitorización automática do tráfico e da mobilidade (sensores bluetooth, Sistemas de Axuda á Explotación do transporte público, etc.) para o seu estudo e análise, coa posibilidade de cruzalos con outro tipo de datos como poden ser os meteorolóxicos. Estes datos tamén alimentan modelos de simulación da mobilidade que permiten avaliar diferentes estratexias e medidas de mellora das condicións de mobilidade en contornas urbanas e metropolitanas.

Elaboración de aplicacións e metodoloxías de análise e tratamento avanzado dos datos pertencentes ás infraestruturas territoriais mediante sistemas cartográficos, para analizar a súa funcionalidade e permitir unha xestión e mantemento máis eficientes, aproveitando diferentes fontes de información (LIDAR, imaxes de satélite, datos vectoriais, modelos dixitais do terreo, etc.).

Desenvolvemento de servizos web (p. ex. emapic.es) deseñados para a elaboración de cuestionarios ou enquisas xeolocalizadas, así como mapas de opinión e consulta, mediante os que se facilita, a calquera persoa, a posibilidade de interactuar con este tipo de tecnoloxías. Trátase de sistemas de información xeográfica que, entre outros posibles usos, permiten aos cidadáns participar dun xeito directo e eficiente nas políticas públicas de xestión da súa cidade, rexión ou país.

Desenvolvemento de modelos de visualización avanzada 3D de proxectos e elementos construídos, dende a gran infraestrutura ata o detalle construtivo. Estes modelos visuais tridimensionais son de gran utilidade en estudos de impacto ambiental, elección de materiais, análise de iluminación, análise de alternativas, simulación de procesos, e, non menos importante, na difusión pública e a promoción dos proxectos.

Desenvolvemento de modelos de recreación de elementos patrimoniais, dende a modelización tridimensional realista da posible aparencia de obxectos xa desaparecidos ata a elaboración de sistemas e contornas para a investigación e difusión en instalacións museísticas. Destacan as solucións sobre dispositivos de interacción natural tales como os baseados en análise de imaxe e xestualidade, e a incorporación de sistemas de visualización mediante realidade mixta, mundos virtuais, etc.

Consiste na implementación de sistemas automatizados de monitorización, control, xestión e avaliación de actuacións da enxeñaría que forman parte do concepto de infraestrutura verde, aplicando solucións baseadas na natureza. As infraestruturas verdes serven como ferramenta que pode mellorar a resiliencia territorial e contribuír a mitigar o cambio climático, aparte de solucionar outros problemas medioambientais como a fragmentación ou a coherencia ecolóxica, mellorando incluso a saúde pública.

Implementación dos dispositivos de medición e de conectividade á rede para a monitorización automatizada e o rexistro dos niveis de concentración de gas radón en edificios, así como para o control automático do funcionamento dos aparellos de renovación de aire en función de ditos niveis, acadando unha xestión eficiente e óptima dos mesmos.

Realización de actividades de implementación da instrumentación científica de medida en ensaios experimentais de calquera ámbito da enxeñaría civil e a edificación, con integración das partes electrónica e informática para o rexistro automatizado dos datos medidos e o seu almacenamento en medios informáticos. Os investigadores que desexen desenvolver experimentos que involucren instrumentación electrónica-informática poden solicitar apoio loxístico, técnico e material deste servizo.